Sa Ibang Mundo

Sisimulan ko ang liham na ‘to sa pagsasabi sayo na kung nasa ibang mundo tayo, ibang sitwasyon, ibang panahon o pagkakataon—kayang kaya kitang mahalin. Kaya kong ibigay sa’yo ang buong puso ko.

Kaya kong ialay sa’yo ang isang pag-ibig na naghihilom ng malalalim na sugat, nagbubura ng masasamang alaala, nagreregalo ng bagong simula.

Kaya kong kabisaduhin ang bawat sulok ng iyong kalungkutan at halikan ang mga ito hanggang dahan dahan silang maglaho.

Kaya kitang turuan na makita ang sarili mo sa mga mata ko—maganda, may mabuting puso, matalino, perpekto.

Kaya kong patunayan sa’yo na mayroong taong handang hawakan ang kamay mo habambuhay. Hindi ka niya bibitawan kahit pa may takot, o hirap, o mas malalambot na kamay na pwede niyang hawakan.
Kamay mo lang ang nanaisin niyang hawakan.
Kamay mo lang ang nanaisin kong hawakan.

Pero masyadong maliit ang mundong ito para sa pag-ibig ko para sa’yo. Hindi ko kayang itupi ang puso ko sa hugis at sukat na kayang tignan ng mga tao. Kaya't ngayon, lalakasan ang loob, titibayan ang dibdib na nangangatog. Iiwan sa iyo ang isang tanong:
Sa iyong tingin, kaya mo kayang sumama sa akin
Sa isang mundong bubuuin ko para lamang sa akin at sayo?

About the Author

---

	Keavy I hate small talk. Twitter | Tumblr

---

(Hindi kita) Kailangan

Hindi naman kailangan
pero gusto ko
marinig ang lahat ng iyong mga kuwento
Kamusta ang araw mo
Mga opinyon mo sa mundo
Mga salitang nanatili sayo mula sa ibang tao
Gusto kong isiping mga maliliit silang parte mo
na maaari kong baunin, sariwain
hanggang sa susunod nating pagtatagpo

Hindi naman kailangan
pero gusto ko
na inaalalayan, inaalagaan ka sa araw-araw mong buhay
Batiin ka sa umaga, paghandaan
Tabihan ka tuwing kailangan
Wala sa akin ang pag-alay ng oras
Wala sa akin ang pag-alay ng pagod
kung ikaw lang rin ang aking pagbabahagian

Hindi naman kailangan
pero gusto ko
na samahan ka tuwing ika'y nabibigatan
Hayaan mong makinig ako sa iyong mga problema
Hahayaan kong sumandal ka kapag nangingilid na ang luha
Hayaan mong yakapin kita
Di man ako ang nais mong hagkan,
baka sakaling sumapat muna ito
para maibsan ang iyong nararamdaman

Hindi naman kailangan
pero gusto ko
na makita kang masaya
Kung kailangan man kitang
awitan
sayawan
kuwentuhan
Gagawin ko
Mahalaga sa akin ang kaligayahan mo

Hindi yata tama
pero minsan naiisip ko
Sana balang-araw mapagtanto mo
na gusto mo ring magbaon ng aking mga kwento
alalayan ako pag kinakailangan
tulungan pag nabibigatan
pag naliligaw, pagsabihan

Hindi naman kailangan
na ikaw ay tumugon
Pero kung pagbibigyan
gusto ko sanang marinig ang sagot mo










About the Author

---

	Jihad Hello po, Jihad po. Twitter

---

Talunan

Hindi naman ako nananabik sa’yo.
Pero minsan, kapag binabalot ng lamig ng sinehan ang aking katawan,
Nararamdaman ang puwang sa naninigas kong mga kamay na sana’y hawak mo
nalang.

Hindi ko pinagsisisihan na ika’y tinanggihan nang ninais mo akong balikan.
Pero minsan, nasisilayan ko ang inyong mga larawan.
May kaunting impit na nararamdaman. May hirap sa paglunok ang lalamunan.

Hindi na kita nakikita sa aking kinabukasan.
Pero minsan, naaalala rin ang pakiramdam noong mayroon pang permanenteng
kakwentuhan.
Marami-rami na ring mga bagay na naglalaho nalang sa hangin dahil wala nang
mapagsabihan.

Hindi na ako nasasaktan kapag sumasagi ka sa ‘king isipan.
Pero minsan, may kaunti ring panghihinayang.
Mga tanong na di na siguro makukuha ang kasagutan.
Bakit hindi mo nalang ako hinayaan?
Kung hindi mo naman sinubukan, paano mo nalamang hanggang diyan ka nalang?

Hindi na kita mahal, sigurado naman ako riyan.
Pero minsan, hindi pa rin mapigilan.
Ibinabalasa ng malikot na isipan ang mga posibilidad,
isa isang binabalikan ang mga nagdaan—
Lahat ng kaligayahan, kalungkutan, kabaliwan na sa ating dalawa lamang.
At magtatapos ang kwento na ako’y isang talunan.
Dahil kahit pa ikutin ang buong mundo katatakbo palayo sa’yo
Hindi pa rin matakasan ang katotohanang ikaw ang simula, gitna at dulo.








About the Author

---

	Keavy I hate small talk. Twitter | Tumblr

---

Ako ang iyong tahanan.

Hayaan mong ako ang maging iyong tahanan

Laging bukas ang pintuan

Mananatili lamang ako sa aking kinalalagyan

Habang ikaw ay laging lumilisan

Ang hinihiling ko lang naman, mahal

Sa dulo ng nakakapagod na araw

Piliin mong ako ang iyong uwian














About the Author

---

	Jihad Hello po, Jihad po. Twitter

---

I long for the day

I long for the day

When I'd finally be able to enjoy

the bitterness behind your brew

Just like how I'd then be able to understand

Everything about you





















About the Author

---

	Jihad Hello po, Jihad po. Twitter

---

Marahil mailap lang talaga ang pagkakataon,

Marahil mailap lang talaga ang pagkakataon,

O tila tutol talaga ang sang-kalawakan

Madalang ang pagkakataon upang magkatagpo tayo

Hindi ko naman masisi talaga ang kung sino o ano mang bagay

Minsan kong tinanong ang langit kung bakit

Ang gusto ko lang naman ay makita ka kahit saglit

Ngunit wala akong natanggap na kahit anong sagot o tugon

Wala sa akin ang ilang minuto, oras, o araw

Basta ba alam kong ang inaantabayanan ay ikaw,

masaya at panatag akong maghihintay

Pero kung hindi lang rin ikaw, mahal,

huwag na lang


About the Author

---

	Jihad Hello po. Jihad po. Twitter

---