Lahat sila'y naghahanap
ng kwentong makulay at mapangahas.
Halimabawa:
"Sa pagbalot ng lamig ng sinehan sa aming mga katawan
humanap kami ng init sa palad ng isa't-isa."
Ang nangyari:
Tahimik lang kaming nanood
at hinayaang manuot ang lamig
sa kani-kaniya naming mga buto
Halimbawa:
"Tinahi namin ng milyon-milyong malalambing na salita
ang gula-gulanit naming mga kaluluwa."
Ang katunayan:
Hinihintay lamang naming matapos
ang bawat isa sa pagsasalita
Wala naman talagang nakikinig
Halimbawa:
"Sa gitna ng pagsasalba namin sa katinuan
ng bawat isa
natutunan niya akong mahalin."
Ang totoo:
Hindi.
About the Author
 | Keavy I hate small talk. Twitter | Tumblr |
No comments:
Post a Comment