Hindi ko sasabihing hindi ako natatakot.
Marami akong bagay na kinatatakutan. Pero ang pagpili ko sa kung nasaan tayo ngayon ang paraan ko para iparating sayo na hinding-hindi ko hahayaang manaig ang mga takot na ito. Hindi ako kayang ilayo ng mga takot ko sayo. Hindi na ulit.
Hindi ko sasabihing magiging masaya tayo palagi.
Pareho nating alam na may mga matang nakabantay. Marami tayong nasagasaan at nasaktan, panigurado pinanonood parin nila tayo. Pero palagi kong pagsisikapan na tapusin ang bawat araw nang may ngiti tayo sa ating mga labi at saya sa ating mga puso. Palagi kong ipapaalala sayo na kapag mahirap lahat, kailangan lang natin kumapit sa lakas ng isa't-isa. Wala tayong hindi kakayanin.
Hindi ko sasabihing hindi kita sasaktan.
Simula palang naman, alam mo ang mga kahinaan ko. Maikli ang atensyon ko, magulo ang isip ko, at kapag nalilito ako, madalas mas pinipili kong tumakbo. Masasaktan at masasaktan kita dahil sa mga kakulangang ito na niyakap mo noong tinanggap mo ako. Pero palagi kong pipilitin na pagbutihin ang sarili ko para sayo. Palagi.
About the Author
 | Keavy I hate small talk. Twitter | Tumblr |
No comments:
Post a Comment